"Namaz Dinin Dirəyidir" İslamın beş şərtindən ikincisi namazdır. Namaz hicrətdən bir il yarım öncə “Merac” gecəsində fərz qılınmışdır. İmandan sonra fərzlərin ən önəmlisi sayılan namaz ruhun, qəlbin mənəvi qidası, insanı Allahın hüzuruna ucaldan bir ibadətdir. Peyğəmbərimizin (s.a.s): “Namaz dinin dirəyidir”, - hədisi bunu təsdiqləyir. Namaz müsəlmanın günahlarını təmizləyən və onu cənnətə girməyə layiq edən ibadətdir. Allah Rəsulu (s.a.s) bununla bağlı buyurur: “Sizlərdən hər hansı birinizin qapısı önündən bir çay axarsa və o şəxs çayda gündə beş dəfə yuyunarsa, onun bədənində çirk qalarmı?” Ona qulaq asanlar: “Xeyr, Ya Rəsulallah! Heç bir şey qalmaz”, - dedilər. Peyğəmbərimiz (s.a.s) : “Gündə beş dəfə qılınan namaz da buna bənzəyir. Allah qılınan namazla günahları silir” - deyə, buyurdu (Buxari, «Səhih», 15775). Namaz qəlblərə Allah qorxusu yerləşdirməklə yanaşı, bizi pis əməllərdən çəkindirir. Ənkəbut surəsinin 45-ci ayəsində Allah belə buyurur: “Sənə vəhy olunan kitabı oxu, namazı düzgün qıl. Həqiqətən, namaz (insanları) abırsızlıqdan və pis işlərdən çəkindirir".
